Pou nouvo lanné la

Nou an koumansman a on nouvo lanné é pou onlo sé on tan pou chanjman. Mé jou sé jou é tan la menm, la la a’y. Si pé ni diférans pou bon ant sa ki té ni avan é sa nou ké viv pannan nouvo lanné lasa, sé ké toujou parapòt a sa nou ké fè pou nou menm.

Ki chimen nou ka désidé pran ? Ola nou vlé alé ? Ka nou vlé pou nou menm ? Mi kèsyon ki pé rédé nou vwè douvan an nou pou kréyé sa nou vlé pou dèmen an nou pa pòtré a yè an nou. Asiré, adan tou sa sé ké toujou travay nou ka désidé fè anlè nou menm ki ké fòs la ki ké pèwmèt nou fè.

Vlé chanjman sé yonn, kréyé chanjman la nou vlé la sé sa ki tout. É menm jan, maché sé mété pyé yonn douvan lòt, konstwi ka mandé fè on aksyon é apré on lòt pou rivé kréyé sa nou vlé. Alòs, adan tou sa moun pé swété moun pou nouvo lanné, KONSYANS ka sanm sa i adan sa ki pli pòtalan davwa i ka pèwmèt nou wouvè zyé anlè nou menm é fè chwa nou ka konswa ki pi bon pou nou pou pé sa fè douvan.

Pou nouvo lanné lasa, annou èspéré chak moun ké vansé an KONSYANS ! Fanmi, pèp, limanité sé toujou moun, moun é moun. Kidonk, lè on moun ka fè pou i ay pli lwen o pou i pi byen, sa ka toujou on limyè pou dòt. Nou pa sa toujou vwè sa mé sé byen on réyalité tout tan vansé lasa pa fèt adan méprizasyon é dèstriksyon. Apoulòsdonk, avè KONSYANS, fò ni LANMOU. Sé li ki ka montré larèl pou pran é pèwmèt on vansé a yonn ka kléré dòt. Apré, chwa é aksyon chak moun ké pran pou vi a’y ké siman pou i konstwi.

Tou sa ka fè, pou nouvo lanné lasa, o dòt ki tini silon kalandriyé ki référans, sa an vlé swété moun sé : KONSYANS é LANMOU. Épi, LAJWA é LAPÉ ki tou natirèlman ka vin avè yo.

Bon lanné !