Lapé an kè !
Lapé an kè !
Pou toujou vansé adan lavi
Lapé an kè !
Pou grandi é vwè solèy kléré
Lapé an kè !
Anpil lanmou, lawmoni, linité
É maché asi chimen Lavérité
Pa pè yé jòdi
Sa ou pa té yé yè
É konstwi dèmen a’w
Onlo ka kouri fòl, ka chèché lakontantman tout alantou a yo
Pasé yo pran tan gadé é chèché andidan yo menm
Chif, popilarité pa ni plis valè ki sa nou vlé ba yo
Latè, lanmè, solèy, pyébwa
Tou sa sé lavi
Sé byen sa ki fondal
Rèspé pou lanati
Kréyasyon a Manman-Papa-Bondyé
Lawmoni épi sa ki alantou an nou
Lanmou an kè an nou
Santi linité andidan nou
Lapé an kè !
Pou toujou vansé adan lavi
Lapé an kè !
Pou grandi é vwè solèy kléré
Lapé an kè !
Anpil lanmou, lawmoni, linité
É maché asi chimen Lavérité
Doubout anba solèy
Pou santi chalè a’y
Mi bèl bénédisyon !
Toujou chèché konnèt listwa
Pou konnèt byen kimoun nou yé
Mi bèl bénédisyon !
Sizé chak jou
É avè jwa pran tan manjé sa Manman-Papa-Bondyé mété la pou nou
Pran fòs épi grandi
Mi bèl bénédisyon !
Chak jou
Fè tibwen ispò
Pran tan pran plézi èspiré
Mi bèl bénédisyon !
Konprann nou tout sé yonn
Konnèt valè a lafanmi
Mi bèl bénédisyon !
Lanmou pou Tè a Zansèt
Pou tou sa Yo fè é pòté ban nou
Mi bèl bénédisyon !
Lapé an kè !
Pou toujou vansé adan lavi
Lapé an kè !
Pou grandi é vwè solèy kléré
Lapé an kè !
Anpil lanmou, lawmoni, linité
É maché asi chimen Lavérité
Tout valè sé valè
Mé tout valè pa menm
Menm jan tout chwa sé chwa
Mé tout chwa pa’a rédé grandi an lèspri é vansé
Toujou ké ni plizyè dirèksyon
Mé yonn pou pé sa toujou chèché gadé pou pa anni pèd chimen
Sé jòdi nou ka fè dèmen
Lison a yè la pou rédé nou konstwi
Bon santiman ka pèwmèt nou pran balan
Détèwminasyon ka opozé nou pèd fwa
Moun fèt avè tou sa ki fo yo pou pé yé
Sa sé byen on biten pou chonjé
Bèbèl pa bèl
Bèbèl pa bèl bèl
Fòs é kalité a lavi an kè an nou tout
Lapé an kè !
Pou toujou vansé adan lavi
Lapé an kè !
Pou grandi é vwè solèy kléré
Lapé an kè !
Anpil lanmou, lawmoni, linité
É maché asi chimen Lavérité
Syanséka
Texte paru dans An kè ! (2014)
