Lanmou pou nou menm

Jan lavi yé, i yé. Pou vré, i yé é sé nou ka bay sans. Nou chak ka vwè’y an jan an nou. Silon édikasyon nou trapé, èspéryans nou viv, nou tini on jan nou ka gadé’y. Mé pou-tout-bon, li i la é nou nou adan’y ka chèché vwè klè. Apoulòsdonk, mannyè réyalité an nou pé ka yé pou nou menm chouké an plen andidan mannyè vwè an nou.

Dépi nanninannan, moun asi latè ka chèché ki sigré ki pé ni pou viv byen byen byen byen byen. Kisiswa péyi la, kilti la o lang la, toujou ni on répons ki ka tonbé. Nou tout konnèt ègzistans a’y, nou fèt èvè’y é jis ni sa ki ka di sé’y ka fè nou. Asiré, kantité ni’y nou ni’y ka fè nou yé kon nou yé. Bèlté a chimen nou ka fè lyanné lyanné avè plas nou ka ba’y. Biten lasa sé : LANMOU.

Nou pé pa palé dè lavi san palé dè lanmou. Sé on santiman ki fondal ! Menm la pa’a rété ayen tout alantou, i toujou la. Nou sèten pé toujou touvé’y. I ka bay fòs. I ka géri bobo. I ka wouvè pòt pou lajwa. Viv avè é adan lanmou toujou bèl. Sav sa, sé yonn. Rivé viv li, mi sé sa ki tout. Sa ka byen sanm sa, vansé a tou lé jou an nou fèt pou nou dékouvè mizi-an-mizi tout dimansyon lanmou pé ni. Sé nou ka pèwmèt li kléré nou. Sé nou ka kité’y pran plas i pou ni an kè an nou. Sé avè lison a lavi, nou ka aprann ba’y lè.

Avè enmé, tini bay. Mé bay pou bay, prèmyé moun pou sa bay sé nou menm. Ka nou pé bay lè nou san ayen ? Fò pé ni pou pé sa ba lézòt. Kifè, pou enmé lézòt fò nou sa enmé nou menm. Sa, sa vlé di kréyé é pran tan konstwi sa ki méyè pou nou yonn kon pou nou tout. Sa vré pou moun é osi pou gwoup moun adonk pou pèp. Té ké ni mwens soufrans asi latè si moun é menm pèp té ka aprann enmé yo menm pou pé sa enmé lézòt. Sé asiré yonn adan biten pi pòtalan ki pé ni pou kréyé on limanité ki bèl.

Konprann plas a lanmou adan konstriksyònman an nou menm é an ta pèp an nou sé limé chaltouné. Kidonk, fè pou fè, ann éséyé fè pou alé pli lwen pasé konsidéré fò fè kont sa ki ja ka ègzisté.  Annou désidé rantré adan on lojik ki ka fè nou konsidéré fò nou KONSTWI. Si nou désidé aprann fè pou nou menm avè lanmou, enpé biten ké chanjé é nou ké pé vwè pi klè.

Olyé égri, kòlè, adan méprizasyon, adan dénigrasyon é rété adan sa ki pa’a rapòté nou ayen, annou chèché dévlopé bon énèwji ki pé sèvi nou é jénérasyon ka vini ! Woudékouvè bèlté a kilti é konprann pi byen éritaj an nou pou voyé’y monté, viv lang an nou é aprann sa i ka di nou asi linivè pou konsyans an nou laji, konnèt toujou plis asi listwa pou konprann dinamik a monn la nou adan’y la é pran tan sav ka Nonm diféran koté asi latè kréyé pou kyenn doubout a yo magré mizè é péripési, pwotéjé sa ki la pou fè nou viv kontèl lanati, laliwondaj an nou, … é sonjé nou ni pou aprann aka lézòt kon yo ni pou aprann akaz an nou. Kon moun abityé di : pawòl dèyè pò’ò mannyé ! Si sé pou gadé byen, ni onlo pou konsidéré asi sijé lasa. Sa ki pé adan près pa ni bout. Sa pou chonjé, sé mété lanmou douvan douvan é nou ké pé fè chwa ki fo. Asiré, chwazi konstwi sé chwazi kité sa ki pli bèl andidan nou sòti pou solèy voyé plis limyè an vi an nou.

An-bout-an-bout, sa pou réyalizé sé si nou chanjé mannyè nou ka konswa nou menm é konswa réyalité an nou, nou ké chanjé é réyalité an nou osi ké chanjé. Natirèlman, ni biten nou pé pa kontwolé é ki la, mé nou pé désidé magré sa chèché fè sa nou ka vwè ki pli bon. Vométan sa pasé rété ka pléré, kòlè o anni vlé lévé gawoulé davwa malérèzman a pa dòt ki lésé sa nou pa vlé, kontwolé nou. Nou pé désidé fè pou on méyè dèmen. La nou yé, avè mwayen nou tini, san pè, doubout avè sa ki pozitif pou vi an nou é monn an nou chanjé.

Annou toujou gadé an lèspri an nou avè lanmou nou pé konstwi é fè douvan !